Deur Marli Naidoo

Loodgieters word ingeroep om stelsels wat gebruik word vir die geleiding van water, riool en gasse in en uit geboue te installeer, te herstel en te ondersoek. Hulle verbind pype aan verskillende soorte industriële en residensiële toebehore, soos verwarming- en verkoelingseenhede, wasbakke, wasmasjiene, baddens, waterverwarmers en toilette. Loodgieters gebruik gewoonlik handgereedskap maar kan ook kraggereedskap, wat sweistoerusting kan insluit, gebruik. Hulle maak ook gebruik van gevorderde diagnostiese toerusting om die druk in pype te bepaal of om foutiewe toerusting op te spoor.

Loodgieters sal altyd werk hê. Hulle kan in die boubedryf gaan werk, by 'n privaat onderneming as werknemer aangestel word, of hul eie sakeonderneming begin. Daar is ook geleenthede om in instandhoudingspanne van geboue te werk.

Daar is twee maniere om 'n gekwalifiseerde loodgieter te word.

1. Jy kan 'n loodgieter-vakleerlingskap voltooi. Om hiervoor toelating te kan kry, moet jy graad 9 met Wiskunde as vak geslaag het, en ten minste 16 jaar oud wees. Die Instituut vir Loodgieters van Suid-Afrika (IOPSA) kan jou van 'n lys van betroubare maatskappye voorsien waar jy jou vakleerlingskap kan doen. Jy sal ook terselfdertyd 'n loodgieter-beroepskwalifikasie by 'n opleidingsinstelling moet bekom, wat beteken dat jy as vakleerling sal werk (70% van jou opleiding) en ook sal studeer (teorie: 30% van jou opleiding). Hierdie proses neem drie jaar om te voltooi.
2. Erkenning van vorige opleiding as ambagsman. Hiervoor moet jy drie jaar ondervinding in loodgieterswerk hê, en ook ouer as 19 wees. Jy sal 'n lys van dokumente voltooi as bewys van ondervinding en dit dan aan 'n opleidingsinstelling voorlê, wat dan sal besluit of jy gereed is vir jou vakmantoets en of jy verdere opleiding moet ontvang. Hierdie toets geskied oor 'n tydperk van twee dae, en jy sal alle praktiese toetse moet slaag om as 'n loodgieter te kwalifiseer.

Indien jy fisiese werk geniet, goed is met probleemoplossing, tegnies aangelê is, die belangrikheid van gesondheid en veiligheid verstaan en goed met mense kan werk, is dit moontlik die perfekte loopbaan vir jou. Hierdie veld is geskik vir mans en vroue.

Bronne:

Post Matric: https://www.postmatric.co.za/plumber/

Skills Portal: https://www.skillsportal.co.za/content/how-become-plumber

Green Building Africa: https://www.greenbuildingafrica.co.za/how-to-become-a-plumber-in-south-africa/